Luk 23 | ENQ | STEP | Dopa lateaminopa kambuoo kateamino akali dupa pitakame sakatatala Jisasa laminao Pailate kateasa peami-pyaa.

a23:2Lu 20:20-26; Ap 17:7, 24:5

b23:3Lu 22:70; 1 Ti 6:13

c23:4Mt 27:24; Lu 23:14,22,41; Jo 19:4,6; Ap 13:28

d23:5Lu 4:4

e23:7Lu 3:1

f23:8Mt 14:1-2; Lu 9:9

g23:9Mk 15:5

h23:11Mk 15:17-19; Jo 19:2-3

i23:12Ap 4:27-28

j23:14Lu 23:4,22,41

k23:16Lu 23:22; Jo 19:12-14

l23:18Ap 21:36

m23:18-19Ap 3:13-14

n23:22Jo 18:38; Ap 3:13

p23:24Ap 3:15

q23:28-31Lu 19:41-44, 21:23-24

r23:29Osi 9:14; Lu 11:27, 21:23

s23:30Osi 10:8; Pa 6:16

t23:31Ese 21:3,8; 1 Pi 4:17

u23:32Ais 53:12; Lu 22:37

v23:34Wee 22:18; Ais 53:12; Mt 5:44; Ap 7:60

x23:35Wee 22:7-8; Lu 2:26, 9:35; Jo 1:34

y23:36Wee 69:21; Mt 27:48; Mk 15:23

z23:38Jo 19:19

aa23:39Mt 27:44; Mk 15:32

ab23:41Lu 23:4,14,22

ac23:42Mt 16:28

ad23:432 Ko 12:3; Pa 2:7

af23:44Emo 8:9

ag23:45Eke 26:31-35, 36:35; Ip 9:8, 10:19

ah23:46Wee 31:5; Ap 7:59

ai23:47Ap 3:14

aj23:48Lu 18:13

ak23:49Wee 38:11, 88:8; Lu 8:2-3

al23:51Lu 2:25,38

am23:55Lu 23:49

an23:56Eke 12:16; 20:10; Dit 5:14; Mk 16:1

Luke 23

Jisasa anjoo soo Pailate kateasa peamino doko

(Mt 27:1-2, 11-14; Mk 15:1-5; Jo 18:28-38)

1 Dopa lateaminopa kambuoo kateamino akali dupa pitakame sakatatala Jisasa laminao Pailate kateasa peami-pyaa. 2 Pupala ^a dokaitame baa tee pyao kosimi lao pituu, “Naima tata dupame kapomane minakasalapale lao akali dakeme dapa lenge: ‘Kapomane Isingi Mupa doko muni takisa namaiyepape!’ lenge. Dee baame baa tange kandao, ‘Namba Kataisa. Namba kiŋi kalyona,’ leamopa naimame siamana,” leami-pyaa. 3 Dokopa ^b Pailateme baa pisoo, “Emba Jutamanya Kiŋi dokope?” lea-pyaa. Dopa leamopa Jisasame Pailatenya pii yanu pyakamaiyoo, “Embame latelenona,” lea-pyaa. 4 Dokopa ^c Pailateme pitisa mupapi endakali limbao kateamino dupapi dupa lamaiyoo, “Nambame akali dake kosimi lapenge tenge mende panala naelyamona,” lea-pyaa. 5 Dopa ^d leamoaka doko, dokaitame kyoto joo lao, “Akali dakeme mana lamaipya dokome endakali dupa mona mende pali-pali petakamaiya. Baame Galili yuu dokonya pituu sakatatala lamaiyoo Jutia yuu pitakanya awali lao endakali pitaka mona sakatasetakamaitala indupa ae ipatelyamona,” leami-pyaa.

Pailateme Jisasa Etote kateasa pena leamo doko

6 Pailateme pii dutupa sepala dokaita pisoo, “Akali dake Galili tange mendepe?” lea-pyaa. 7 Dopa ^e leamopa dokaitame, “Jisasa baa akali Etoteme yuu isingi Galili dotena tangena,” lao lamaiyami-pyaa. Dokopa Pailateme akali Galili dotena tange Jisasa doko Etoteme kosimi lapengena lao masetala, Etote doko Jetusaleme dokonya kateamopaka dokonyana, yanda singi amii mendapuame Jisasa laminao Etote kateasa pena lea-pyaa. 8 Wamba ^f Etoteme Jisasanya lao pii mendapua sepala kongali mende pitamo kandapu laka lao masoo gii longo malisoo katea-pyaa. Malisoo kateamopa Jisasa epeamo doko kandatala mona etete yaepea-pyaa. 9 Dokopa ^g baame pii longo lao Jisasa pisia-pyaa. Pisiamoaka doko, Jisasame pii mendaipi mende yanu napia-pyaa. 10 Dokopa pitisa mupapi mana setapae masingi akalipi dupame tengesa ipao katapala kyoto joo Jisasa kosimi leami-pyaa. 11 Dopa ^h piaminopa Etote mauwapi baanya yanda singi amii dupapimi Jisasa kilya kandao baa-kisa makande koo longo minao baa minakasoo yonge pee epe etete mendeme baa yati pyakamaiyami-pyaa. Dopa petakamaiyaminopa Etoteme yanda singi mendapuame baa laminao Pailate kateamo dokonya pilyina lea-pyaa. 12 Wamba ⁱ Etote Pailatepa yandapipi joo kateambinoaka doko, gii dokopa kaita miningi jiambi-pyaa.

Jisasa pyao kumasina Pailateme leamo doko

(Mt 27:15-26; Mk 15:6-15; Jo 18:39—19:16)

13 Dokopa Pailateme pitisa mupapi, isingi akalipi, dee endakali meepi dupa epena lao nyoo limbia-pyaa. 14 Ipao ^j limbateaminopa baame dokaita lamaiyoo, “Akali dakeme ‘Nyakamame kapomane minakasalapa!’ lengena lao kosimi lalamino dokonya nambame baa nyakamanya enombasa makande pyoo pisipupa kosimi lapenge tenge dopale mendaipi mende baa-kisa panala naelyamo. 15 Dee ^k Etoteme apata tenge kutao kayapala baa pilyoo naima-kisa epena lameaka lamona salapape. Akali dake pyao kumasepenge mana koopi mende baame naminia lamo dokonya nambame baa konjame pyapala yakinatoana,” Pailateme dopa lea-pyaa. 17 Gii ^{l
,} ^m dokopa akali Batapasa lenge mende anjetae palea-pyaa. Akali dokome yuu taono Jetusaleme dokonya kapomane yanda pimaita endakali mendapua pyao kumaseta petala anjetae palea-pyaa. [Ee kana dii lao Isataelemanya Napinya Kayamo Gii epe doko epelyali pyoo Pailateme dokaitanya endakali anjetae dupanya mendai mende mokata pyakamaingi-pyaa.] Dokonya endakali kambu pyao kateamino dupa pitakame puu lao, “Akali dake pyao kumasetala Batapasa doko mokakape!” leami-pyaa. 20 Dopa lateaminopa Pailateme Jisasa mokapuli lao masetala pii wamba lateamo dokoaka puu lao dokaita dee lamaiya-pyaa. 21 Lamaitiamoaka doko, dokaitame puu lao lao, “Baa ita pokonya pyao yuka! Pyao yuka!” lao deaka leami-pyaa. 22 Dokopa ⁿ Pailateme paa tepo pyoo dokaita lamaiyoo, “Akali dakeme koo aki mende piape? Nambame baa pyao kumasepenge tenge mende panala naelyamona baa konjame ^{▼▼k konjameJutapi Loma tange dupapi dupame kende mendapua elyambu pyoo minatala puna dupanya kana kuli akipi mendapua anjilyamipi dee puna dupa pongo pongo pilyamipi petala pingima-pyaa.} pyapala yakinatoana,” lea-pyaa. 23 Dopaka doko, dokaitame kongapu pyao ae lao, “Baa ita pokonya pyao yuka!” leamino dokome Pailatenya pii leamo doko pyaanya isa palyiami-pyaa. 24 Dopa ^p piamino kandatala Pailateme dokaitanya pii watao minatala leaminoli pina kayatowana lao masia-pyaa. 25 Dopa lao masetala dokaitame akali Batapasa lenge kapomane yanda pimaita endakali pyao kumaseta petala anjetae paleamo doko mokekena leaminosa baame mokakamaiya-pyaa. Dopa petala baame dokaitanya leaminoli pyakamaina lao Jisasa baa yanda singi dupa maiya-pyaa.

Jisasa ita pokonya pyao yukuiyamino doko

(Mt 27:32-44; Mk 15:21-32; Jo 19:17-27)

26 Dokopa yanda singi dupame Jisasa ita pokonya pyao yukualanya laminao peaminopa akali Saimone lenge yuu taono Saitini tange mende Jetusaleme ipanya epeamopa kaitinisa kandanyiami-pyaa. Kandanyetala Jisasanya ita poko doko sakamaina lao baanya lataiyanya nyoo sakamaiyaminopa baame soo Jisasa watao pea-pyaa. 27 Dokopa endakali kambu andake mendeme Jisasa watao peami-pyaa. Enda longo dupame baa lao masetala ee lao yamataka lao peami-pyaa. 28 Dopa ^{q
,} ^{r
,} ^s lao peaminopa Jisasame kapilyetala dupa lamaiyoo, “Tenda gii doko ipatamopa endakali dupame, ‘Enda ingi pyakilyetae, wane namandenge, wane andu nanenge enda dupa iki mona yaepatae pilyaminona,’ latami. Tenda endakali dupame ‘Yuu manda dupa longapala naima pyaa!’ latami. Dee yuu manda yakane dupame, ‘Naima pyao sanga pyaa!’ lao katatami. Dopana, nyakama Jetusaleme tange enda dupame namba kandao ee laa nayalapape. Nyakama tangepi nayakamanya wanepi dupa lao masoo ee laapape. 31 Indupa ^t makande dapale dupa ita saka doko-kisa setelyamino doko tenda ita sapu dupa-kisa makande aipale mende kapa pao ipatape?” Jisasame lea-pyaa.

32 Yanda ^u singi dupame Jisasa pyao kumasalanya laminao pao pituu akali mana koo miningi waka lapoma baa-pipa awapa pyao kumasalanya laminao peamiaka-pyaa. 33 Dokaitame yuu kenge Matenakulimanda lenge dokonya pao lai petala, Jisasa baa ita poko mendenya pyao yukuiyami-pyaa. Mana koo miningi akali dolaponya mende Jisasanya kingi tolae-kaita pyao yukuotala, mende doko koya-kaita pyao yukuiyami-pyaa. 34 [Yukuoteaminopa ^v Jisasame lao pituu, “Dokaitame masala nayao pilyaminona, Apane, embame dupanya koo dokonya yanu dupa nyala naenya kayape!” lea-pyaa.] Yanda singi dupame kana yakane dupa pyasoo male pyoo ^{▼▼l male pyooNaimame opale mende ita minao nyalanya masisa pyao male pingili pyoo yanda singi amii dupame Jisasanya yonge pee nyalanya kana yakane dupa pyasoo ita minao nyiami-pyaa.} ita miniamino akali dupame Jisasanya yonge pee dupa mokosoo nyiami-pyaa. 35 Gii ^x dokopa endakali dupame kandatae kateaminopa Jutamanya isingi akali dupame Jisasa kandao lamba lao pituu, “Baame endakali waka dupa nisiana baa akali Goteme yapao nyepae kiningi Kataisa tamo kandao doko, baame baa tange nisinana!” leami-pyaa. 36 Dopa ^y lateaminopa yanda singi dupame tengesa ipupala baa minakasoo waene kaa pipae mende nena lao maiyoo pituu, “Emba Jutamanya Kiŋi tamo kandao doko, embame emba tange nisa!” leami-pyaa. 38 Jisasa ^z yukuotae kateamo ita poko dokonya ketae dosa pepa mende dapa lao pyatae katea-pyaa: ‘Dake Jutamanya Kiŋi dokona,’ lao pyatae katea-pyaa.

39 Dee ^aa akali kalai koo pingi lapoma pyao yukuiyamino dolaponya mendeme Jisasa kandao lamba lao pituu, “Emba Kataisa doko tamo kandao, embame emba tange nisetala, nalimba apata nisa!” lea-pyaa. 40 Dopa leamoaka doko, koo pingi akali mende dokome baa pyalanya lao, “Embame kenda pipae baame nyilyamo dopaleaka nyoo pituu Gote paka nakaelepe? 41 Nalimbame ^ab koo piambano dokonya yanu nyilyambano doko kapa pelyamo. Dopaka doko, akali dakeme koo mende napiana,” lea-pyaa. 42 Dopa ^ac latala baame Jisasa lamaiyoo, “Jisasa, embame kiŋi jetala ipateno gii dokopa namba kame sala nayape!” lea-pyaa. 43 Dokopa ^ad Jisasame baa lamaiyoo, “Nambame emba kiningi langilyo! Indupaka Patandisa ^{▼▼m patandisaJuta dupame Gotenya kaiti yuu auu pyoo katapenge dokonya yuu enenge mende silyamona lao masetala kenge Patandisa lengema-pyaa.} yuu dokonya pao kalyambanona,” lea-pyaa.

Jisasa kumiamo doko

(Mt 27:45-56; Mk 15:33-41; Jo 19:28-30)

44 Kotaka ^{af
,} ^ag andawai pungupungu dokonya pituu yuu doko pitaka kuiyatala, kuiyatae katao pao alemandi kiloko tepo lea-pyaa. Dee losuu anda andake dokonya lapalapa andake yukuotae katenge doko kainanya lapyepala lapoma pia-pyaa. 46 Dokopa ^ah Jisasame etete puu lao ae lao, “Apane! Nambanya imambu doko emba dilyona, embame isoo katakape!” latala kumalu pia-pyaa. 47 Yanda ^ai singi amii isingi akali dokome piamo doko kandatala Gote lalyoo, “Kiningi etete, akali dake tolatae lamona,” lea-pyaa. 48 Dokopa ^aj endakali longo kambu pyao kanja epeamino dupame piamo dupa kandatala mona kenda kayao kingi tukyoo andaka pilyiami-pyaa. 49 Gii ^ak undinaka Jisasapa awapa kateamino akali dupa pitakapi, dee yuu Galili pituu Jisasapa awapa peamino enda dupapi dupame yuu dokonya kuki tependale katao piamo dupa kandatae kateami-pyaa.

Jisasa malu piamino doko

(Mt 27:57-61; Mk 15:42-47; Jo 19:38-42)

50 Wamba ^al akali Josepe lenge mende Jutamanya yuu taono Atimatia lenge dokonya katao Jetusaleme ipao katea-pyaa. Baame mana epe tolao minao katao Goteme isala ipatana lao masetala malisoo katea-pyaa. Dee baa Jutamanya kanjole joo kateamoaka doko, kanjole waka dupame Jisasa pyao kumasemana lao pii wasiamino gii dokopa baame ŋee laa naya-pyaa. Dee angi piamino dokopa baame ŋee naleaka-pyaa. 52 Josepe dokome akali Pailate peteasa pupala Jisasa doko dina lao tee lea-pyaa. 53 Dopa lao tee lateamopa Pailateme kapana lea-pyaa. Dokopa baame Jisasa kondao nyepala lapalapa epe kyoto mendeme ambo pyapala nyoo soo ipao malu pipenge kananda tumbyepae wamba endakali kumapae mende setala nayami mendenya setea-pyaa. 54 Doko kalai yuungi mendenya dopa pia-pyaa. Gii doko alemanjetala Sambasa gii doko ipanya tengesa petea-pyaa. 55 Dopa ^am piamopa enda wamba Galili yuu dokonya pituu Jisasa watao payamino dupame akali Josepe doko watao pao malu pingi panda dokonya baame Jisasa aipa pyoo setelyape lao kanja peami-pyaa. 56 Kandatala ^an andaka pilyetala welepi opale tunduma pipae mendapuame Jisasanya yonge doko kai pyatamana lao depa latala Sambasa gii dokonya mana singili pyoo mee andaka peteami-pyaa.